ఎడిటోరియ‌ల్
– స్వామి ముద్దం
2023లో టర్కీలో సంభవించిన భయంకరమైన భూకంప సమయంలో, మన దేశం భారతదేశం “ఆపరేషన్ దోస్త్” పేరుతో మానవతా సహాయాన్ని చాటిచెప్పింది. ఎలాంటి ప్రతిఫలాపేక్ష లేకుండా, నిశితమైన సమయపాలనతో, సాంకేతిక నిపుణులు, వైద్య సిబ్బంది, NDRF బృందాలు, అవసరమైన ఫీల్డ్ హాస్పిటల్స్‌తో సహా విస్తృత స్థాయిలో సహాయాన్ని పంపింది. టర్కీ అధికారికంగా ఈ సాయాన్ని గౌరవించింది, భారతదేశాన్ని “దోస్త్” అని అభివర్ణించింది. కానీ రెండు సంవత్సరాల వ్యవధిలోనే టర్కీ భారత్‌కి వ్యతిరేకంగా వ్యవహరించడం ఆందోళనకరమైన పరిణామం.
2025లో జమ్మూ కాశ్మీర్‌లోని పహల్గామ్‌లో జరిగిన ఉగ్రదాడి నేపథ్యంలో, టర్కీ పాకిస్తాన్‌కు ఆరు C-130 హెర్క్యులస్ సైనిక విమానాల్లో ఆయుధాలు పంపించినట్టు సమాచారం వెలుగులోకి వచ్చింది. పాకిస్తాన్‌కి వ్యతిరేకంగా భారత్ నిత్యం పోరాటం సాగిస్తున్న తరుణంలో, టర్కీ ఈ విధమైన సైనిక మద్దతు అందించడం మిత్రదేశంగా వ్యవహరించిన భారతదేశాన్ని అవమానించడమే కాదు – అది నైతికంగా తప్పు కూడా.
టర్కీ, పాకిస్తాన్, చైనా మధ్య సమన్వయం, భారతదేశాన్ని దక్షిణాసియాలో వ్యతిరేక కూటమిగా నిలబెట్టే వ్యూహం అనిపిస్తుంది. 1980లలోనే టర్కీ–పాకిస్తాన్ మధ్య రక్షణ ఒప్పందం కుదరగా, 2021లో ఆయుధ ఉత్పత్తి సహకార ఒప్పందం, 2024లో బియాండ్ విజువల్ రేంజ్ మిస్సైళ్ల అభివృద్ధి చర్చలు టర్కీ లక్ష్యాలను స్పష్టం చేశాయి. ఇది కేవలం ఆర్థిక లబ్దిని కంటే, ప్రాంతీయ ప్రాభవాన్ని పెంచే వ్యూహంగా కనిపిస్తోంది.
సామాజిక మాధ్యమాలలో భారతీయులు తమ కోపాన్ని బహిర్గతం చేశారు. #BoycottTurkey, #UnthankfulTurkey వంటి హ్యాష్‌ట్యాగ్‌లు ట్రెండ్ అయ్యాయి. టర్కీ పర్యాటకాన్ని, టర్కీ ఉత్పత్తులను, టర్కిష్ ఎయిర్‌లైన్స్‌ను బహిష్కరించాలని పిలుపులు వినిపించాయి. ఇది కేవలం ఒక విధమైన ఆగ్రహం మాత్రమే కాదు – దేశభక్తి భావం, భారతదేశానికి జరిగిన అన్యాయాన్ని ఎదుర్కోవాలన్న సంకల్పం కూడా.
భారత విదేశాంగ విధానం సాధారణంగా ధీరత్వంతో పాటు వ్యూహాత్మక దృష్టికోణం కలిగి ఉంటుంది. టర్కీతో ఉన్న వ్యాపార సంబంధాలు – ఉదాహరణకు $12 బిలియన్లకు చేరిన ద్వైపాక్షిక వాణిజ్యం – పూర్తిగా తెగిపోవడం ఇప్పట్లో సంభవించకపోయినా, భారత్ పునరాలోచనలోకి వెళ్తుంది. టర్కీ పాకిస్తాన్‌తో సైనిక సహకారాన్ని కొనసాగిస్తే, భారత్ ప్రత్యామ్నాయ దేశాలతో సంబంధాలను బలోపేతం చేయడం ఖాయం. ఇప్పటికే రష్యా, ఫ్రాన్స్, ఇజ్రాయెల్‌లతో భారత రక్షణ సహకారం దృఢంగా ఉంది.
2023లో భారతదేశం చూపిన మానవతా సాయం, సౌహార్దానికి ప్రతీక. కానీ టర్కీ ఇటీవలి చర్యలు ఆ విశ్వాసాన్ని పిండేశాయి. ఇది గ్లోబల్ పాలిటిక్స్‌లో “ధన్యవాదం” అనే భావన ఎంత పరిమితమైందో చూపిస్తుంది. టర్కీ జియోపాలిటికల్ లబ్దిని ఆశించి భారత్‌కు అవమానం కలిగించినా, మన దేశం సుదీర్ఘ దౌత్యాన్ని కొనసాగిస్తూ, తన భద్రతా ప్రయోజనాలను ముందే ఉంచుకొని, వ్యూహాత్మక మార్గంలో స్పందించాల్సిన అవసరం ఉంది.